මැලේසියාවේ පැවැත්වෙන පොදු රාජ්‍ය මණ්ඩලීය ක්‍රීඩා උළෙලේ කාන්තා සුදුසුකම් ලැබීමේ ක්‍රිකට් තරගාවලියේ සෙනසුරාදා (22) පැවැති තවත් තරගයකදී ශ්‍රී ලංකා කාන්තා කණ්ඩායම ලකුණු 93 ක ජයක් සත්කාරක මැලේසියා කාන්තා කණ්ඩායමට එරෙහිව ලබාගැනීමට සමත්විය. එම ජයග්‍රහණයත් සමඟ චමරි අතපත්තුගේ නායකත්වයෙන් යුතු ශ්‍රී ලංකා පිල එම තරග වටය යටතේ සහභාගිවූ තරග 3 ම ජය ගනිමින් ඉදිරියට යෑම කැපී පෙනෙයි.

මැලේෂියාව මේ තරගයේ කාසියේ වාසිය දිනා ශ්‍රී ලංකාවට මුලින් පන්දුවට පහරදීමට ඇරියුම් කළ අතර ශ්‍රී ලංකා කාන්තා කණ්ඩායම පන්දු වාර 20කදී කඩුලු 3ක් දැවී පන්දුවාර 20 අවසානයේ ලබාගත් ලකුණු 175ට පිළිතුරු ලෙස මැලේෂියා කාන්තා කණ්ඩායම පන්දුවාර 20 අවසානයේ කඩුලු හතක් දැවී ලබාගත්තේ ලකුණු 82ක් පමණකි.

ශ්‍රී ලංකා උප නායිකා හර්ෂිතා මාධවී පන්දු 42කදී හතරේ දහයක් සමඟ නොදැවී ලකුණු 65ක් රැස්කරමින් තරගයේ දක්ෂතම ක්‍රීඩිකාව ලෙස තේරිණි. හර්ෂිතාට අමතරව නිලක්ෂි ද සිල්වා පන්දු 31කදී හතරේ හතක් සමඟ නොදැවී ලකුණු 49ක්ද නායිකා චමරි අතපත්තු පන්දු 17කදී හතරේ හතක් සමඟ ලකුණු 30ක්ද රැස්කළහ. මැලේෂියා නායිකා දුරායි සිං ලකුණු 42ක් ලැබුවාය.

හර්ෂිතා මාධවී සහ නිලක්ෂි ද සිල්වා සිව්වන කඩුල්ලට පන්දු 46කදී ලකුණු 87ක සබඳතාවයක් තබා ගනිමින් ලංකා කණ්ඩායමේ හොඳම සබඳතාවය වාර්තා කළහ. ශ්‍රී ලංකා කණ්ඩායමේ අවසාන තරගය පැවැත්වෙන්නේ 24 වැනිදා බංග්ලාදේශය සමඟය.

ශ්‍රී ලංකා කාන්තා කණ්ඩායම පන්දුවාර 20කදී කඩුලු 3ට 175යි – (හර්ෂිතා මාධවී නොදැවී 65, නිලක්ෂි ද සිල්වා නොදැවී 49, චමරි අතපත්තු 30, නික් නූර් අටෙයිලා 21/1යි)

මැලේෂියා කාන්තා කණ්ඩායම කඩුලු 7ට 82යි – (විනිෆ්‍රෙඩ් ඩුරායි සිං 42, නූර් නට්ශ්‍යා 10, සුගන්ධිකා කුමාරි 12/2, ඕෂදි රණසිංහ 14/2)

The post මැලේසියාව පැරදූ ශ්‍රී ලංකා කාන්තාවෝ අපරාජිතව ඉදිරියට ඇදෙයි appeared first on Sri Lanka Cricket.

අවුරුදු 19න් පහළ ලෝක කුසලාන ක්‍රිකට් තරගාවලියේ මේවන විට විශිෂ්ට දස්කම් දක්වමින් සිටින ශ්‍රී ලංකා යොවුන් ක්‍රිකට් කණ්ඩායම සිකුරාදා (21 දා) රාත්‍රියේ සත්කාරක බටහිර ඉන්දීය කොදෙව් දූපත් පිලට එරෙහිව කඩුලු තුනක ජයක් අත්කර ගනිමින් අපරාජිතව දෙවැනි තරග වටයට සුදුසුකම් ලබා ගැනීමට සමත්වූවේය.

‘ඩී’ කාණ්ඩය යටතේ තරග වැදි තරග 3 ම ජය ගනිමින් සුපිරි කණ්ඩායම් අතර තරග වටයට සුදුසුකම් ලබා ගැනීමට ශ්‍රී ලංකා කණ්ඩායම සමත් වද්දී සත්කාරක බටහිර ඉන්දීය කොදෙව් කණ්ඩායම මූලික වටයෙන්ම ඉවතට විසිවීම කැපී පෙනිණ. ඒ අනුව 2016 වසරෙන් පසු ශ්‍රී ලංකා කණ්ඩායමක් පළමු කණ්ඩායම් 8 අතර තරග වටයට සුදුසුකම් ලබාගත් පළමු අවස්ථාව ලෙසින්ද මෙම තරගාවලිය ඉතිහාස ගත වන්නේය.

අවසන් වරට ශ්‍රී ලංකා කණ්ඩායම සුපිරි කණ්ඩායම් 8 අතර තරග වටයට සුදුසුකම් ලබන ලද්දේ චරිත් අසලංකගේ නායකත්වය යටතේ 2016 වසරේදී බංග්ලාදේශයේ පැවැති ලෝක කුසලාන තරගාවලියේදීය. වනිඳු හසරංග පවා ක්‍රීඩා කරන ලද එම තරගාවලියේදී ශ්‍රී ලංකාව අවසන් පූර්ව තරග දක්වා පැමිණීමට සමත්විය.

කොදෙව් කණ්ඩායම පන්දුවාර 50 අවසානයේ කඩුලු නවයකට ලබාගත් ලකුණු 250 පහසුවෙන් හඹාගිය ශ්‍රී ලංකා යෞවනයෝ පන්දුවාර 48.4 කදී සපුරා ගන්නා ලද්දේ කඩුලු 7ක් පමණක් ප්‍රතිවාදීන් හමුවේ ලබා දෙමිනි.

ශ්‍රී ලංකා කණ්ඩායම අයත්වූ “ඩි” කොටසේ ඕස්ට්‍රේලියාව, බටහිර ඉන්දීය කොදෙව් දූපත් සහ ස්කොට්ලන්තය යන කණ්ඩායම් තුනම පහසුවෙන්ම පරාජය කරමින් ශ්‍රී ලංකාව එම කොටසේ ප්‍රථම ස්ථානයේ මේ වනවිට පසුවන්නේ ජයග්‍රාහී විලාශයෙනි.

ශ්‍රී ලංකා – බටහිර ඉන්දීය කොදෙව් දූපත් තරගයේ ලංකා නායක දුනිත් වෙල්ලාලගේ නැවත වතාවක් පන්දු යැවීමේදී දස්කම් දක්වමින් ලකුණු 39කට කඩුලු තුනක් දවාලූ අතර ලංකා පිතිකරුවන් අතුරින් කැපීපෙනුණේ ආරම්භක පිතිකරු සදීෂ රාජපක්ෂ (76) අංජල බණ්ඩාර (40) ෂෙවොන් ඩැනියෙල් (34) සහ රනුදු සෝමරත්නය (නොදැවී 28) ය.

ලකුණු 251ක් ජයග්‍රාහී ඉලක්කයක් කරා යාමට ශ්‍රී ලංකා කණ්ඩායම පැමිණි අවස්ථාවේදී ලංකා කණ්ඩායම පන්දුවාර 39.4ක් වන විට කඩුලු පහකට ලකුණු 199ක් රැස්කරමින් ජයග්‍රහණය අභියස සිටියදී ප්‍රබල පිතිකරු සදිෂ රාජපක්ෂගේ දැවීයාමත් සමඟ ලංකා ජයග්‍රහණය මදක් ප්‍රමාදවිණි. ආරම්භක පිතිකරු ලෙස පිටියට පිවිසි සදිෂ පස්වැනි පිතිකරු ලෙස දැවී යනතෙක්ම මහඟු සේවයක් කණ්ඩායම වෙනුවෙන් ඉටුකරමින් කණ්ඩායමේ වැඩමි ලකුණු ලාභියා බවට පත්වූයේ පන්දු 115කට මුහුණදී හතරේ පහක් සමඟ ලකුණු 76ක් ලබාගනිමිනි. ඔහුගේ ඉනිම තරගයේ වීරයා සම්මානයද ඔහුට ගෙන දුන්නේය.

ලංකා කණ්ඩායමේ හොඳම සබඳතායන් දෙක වූයේ සිව්වන කඩුල්ලට සදිෂ රාජපක්ෂ සහ අන්ජල බණ්ඩාර එක්ව පන්දු 94 කදී එක් කළ ලකුණු 78 ත් දෙවන කඩුල්ල වෙනුවෙන් සදීෂ රාජපක්ෂ සහ ෂෙවොන් ඩැනියල් එක්ව පන්දු 50 කදී රැස් කරන ලද ලකුණු 52 ත් වේ.

අංජල බණ්ඩාර පන්දු 52කදී හතරේ දෙකක් හයේ පහරක් සමඟ ලකුණු 40ක්ද ෂෙවොන් ඩැනියෙල් පන්දු 33කදී හතරේ පහක් හයේ පහරක් සමඟ ලකුණු 34ක්ද රනුදු සෝමරත්න පන්දු 27කදී හතරේ තුනක් සමඟ නොදැවී ලකුණු 28ක්ද දුනිත් වෙල්ලාලගේ පන්දු 15කදී හතරේ දෙකක් සමඟ ලකුණු 15ක්ද රවීන්ද සිල්වා පන්දු 14කදී ලකුණු 13ක්ද රැස්කළහ.

නායක දුනිත් වෙල්ලාලගේ මේවන විට පන්දු යවමින් තරග තුනකදී කඩුලු 13ක් ලබා වැඩිම කඩුලු ලාභීන්ගේ ලැයිස්තුවේ ඉදිරියෙන්ම සිටී. සාන්ත කිට්ස් දූපතේ පැවැති මේ තරගයේ කාසියේ වාසිය දිනු ශ්‍රී ලංකාව තීරණය කළේ මුලින් පන්දු රැකීමය. කොදෙව් කණ්ඩායමේ ලකුණු රැස් කිරීමේ වේගය ඉනිම ආරම්භයේ අඩාලව තිබුණත් මැද හා අග භාගය වන විට එය වේගවත් විණි. ඔවුන් අවසාන පන්දු වාර 12දී ලකුණු 90ක් (කඩුලු 5කට) රැස්කළ අතර එයින් ලකුණු 48ක්ම ලබාගත්තේ අවසාන පන්දු වාර හතරේදීය.

නායක දුනිත් වෙල්ලාලගේ සහ ‍ට්‍රෙවීන් මැතිව් තම ප්‍රථම පන්දුවාර ඉතා දක්ෂ අයුරින් යැව්වත් ඔවුනගේ ඉතිරි පන්දුවාර කිහිපයෙන්ද වැඩි ලකුණු සංඛ්‍යාවක් ලබා ගැනීමට කොදෙව් මැදපෙළ සහ අගපෙළ පිතිකරුවෝ සමත්වූහ.

කොදෙව් පිතිකරුවන් අතර කැපී පෙනුණු කෙවින් වික්හම් පන්දු 91කදී හතරේ පහක් හයේ පහරක් සමඟ ලකුණු 56ක්ද ජෝර්ඩ්න් ජොන්සන් පන්දු 56කදී හතරේ හතරක් හයේ පහරක් සමඟ ලකුණු 47ක් ටෙඩී බිෂොප් සහ රිවල්ඩෝ ක්ලාක් ලකුණු 45 බැගින්ද මැකනි ක්ලාක් ලකුණු 21ක්ද රැස්කළහ.

ප්‍රථම තරග දෙකේදී කඩුලු දහයක් ලබා සිටි ශ්‍රී ලංකා නායක දුනිත් වෙල්ලාලගේ මේ තරගයේදීත් ලකුණු 39කට කඩුලු තුනක්ද මතීෂ පතිරාජ ලකුණු 67කට කඩුලු දෙකක්ද ට්‍රවීන් මැතිව් ලකුණු 38කට කඩුල්ලක්ද දවාලූහ.

ලකුණු විස්තරය

බටහිර ඉන්දීය කොදෙව් දූපත් පන්දුවාර 50දී කඩුලු 9ට 250යි – (කෙවින් වික්හම් 56, ජෝඩ්න් ජොන්සස් 47, ටෙඩී බිෂොප් 45, රිවල්ඩෝ ක්ලාක් 45, දුනිත් වෙල්ලාලගේ 39/3, මතීෂ පතිරණ 67/2, ප්‍රවීන් මැතිව් 37/1යි)

ශ්‍රී ලංකාව පන්දුවාර 48.4කදී කඩුලු 7ට 251යි – (සදීෂ රාජපක්ෂ 76, අංජල බණ්ඩාර 40, ෂෙවොන් ඩැනියල් 34, රනුදු සෝමරත්න නොදැවී 28, දුනිත් වෙල්ලාලගේ 15, රවීන් ද සිල්වා 13, මැකනි ක්ලාක් 28/2යි)

The post වසර 6 කට පසු යෞවනයෝ අවසන් කණ්ඩායම් 8 ට සුදුසුකම් ලබති appeared first on Sri Lanka Cricket.